وكالة أنباء الشعر
مقالات مشابهة
(واحة شاعر المليون)، مساحه جديده في وكالة انباء الشعر العربي، نقدم من خلالها نجوم شاعر المليون في كل مواسمه عبر نصوص شعريه جديدة لنعود بذاكرتنا الى ثلاثة عشر عاما من الابداع والتميز والحضور المبهج في مواسم شاعر المليون في مواسمه التي حفلت بكل ماهو جميل تلك السنابل التي زرعها ثمانية واربعين شاعر قدمهم البرنامج لتزهو بهم ساحة الشعر والابداع . من خلال هذه المساحة نعيد لكم نجوم كل المواسم في باقة شعرية نقدمها لقراء ومتابعي الوكالة.
واحة اليوم كانت مع نجم شاعر المليون الشاعر فلاح بن ذروه الي أهدى الوكالة ثلاث قصائد مميزة .
حب الخشوم
ياغتير العِرف ماتبت من حب الخشوم
عايش بتبجيل الاصنام واوثان ودُمى
راح عمرك وانت ترجي من اصحاب الختوم
عالق بطرف الامل بين عل وربما
ضايع وماتعرف الدرب واطيح وتقوم
في طريقٍ منحدر تايهٍ كنك عمى
شايلٍ في جعبتك رمح واتناطح سهوم
راميٍ ماصاب كبد الحقيقة ، ما رمى
لي متى وانت اتوهم على شي معدوم
حايرٍ وتقول :- يمكن وجايز وانما
اطلب الله لاغزا بالك ، اكبار الهموم
لاترجى رجلٍ اليا طلبته ، مااحتمى
لاتذمر وانت من رحمته ماانت محروم
رحمة الله واسعة لو شكيت مْن الضما
و البشر لاصكت ابوابها وقت اللزوم
دعوة المظلوم مفتاح لابواب السما
القلوب المبغضه
انا صديق الكل ما اكره الكل
والكل بصره في حياته وكيفه
وان زل غيري في قفا الناس مازل
الله منعني والنوايا نظيفه
ياوالله اللي عارف الدرب وادل
يوم الحليف يبور عنده حليفه
يوم القلوب المبغضه تمتلي غل
الله وقانا من العقول الضعيفة
ماني كما اللي يخلف الدرب ويضل
عفيف واحب الوجيه العفيفه
سلام يارجلٍ من الجود ما مل
مايرده فقره ليا جاه ضيفه
ماهمه الدولار لازاد وان قل
ولا ربيع الوقت ولا خريفه
كريم سبلا أتْله المرجله تل
ولقْمَتْه ويا صاحبه بالنصيفه
والصاحب اللي فالمواقف خذ وخل
ضعيف لاجات الامور الكليفه
يامدورين الطيب عندي لكم حل
رجْلٍ بليا جود / عينٍ كفيفه
رجال بعض احيان يغني عن الكل
وينوب في المواقيف .. سيفه
اخر الالهام
لك الله ياحبٍ بنيته من .. الاوهام
تعلق ثلاث سنين ماحقق احلامه
.
يساير ظروف الوقت ويسايس الايام
ولا انكسرت ايدينه ولا تَعْبتْ اقدامه
.
ولا طاحت عزومه ولا جفت الاقلام
فدا .. خله الشاعر وبوحه واقلامه
.
تعلق على طَرْف الامل وآخر الالهام
وكلت عمره الايام في آخر اعوامه
.
يكابر على جرحه وهمه والاستسلام
يبي يحتظن غاياته ويبصم أبهامه
.
على كل جرح يقول للمعظله قداام
ولامن تقدم مالقى شي .. قدامه !!!
