وكالة أنباء الشعر
مقالات مشابهة
(واحة شاعر المليون)، مساحه جديده في وكالة انباء الشعر العربي، نقدم من خلالها نجوم شاعر المليون في كل مواسمه عبر نصوص شعريه جديدة لنعود بذاكرتنا الى ثلاثة عشر عاما من الابداع والتميز والحضور المبهج في مواسم شاعر المليون في مواسمه التي حفلت بكل ماهو جميل تلك السنابل التي زرعها ثمانية واربعين شاعر قدمهم البرنامج لتزهو بهم ساحة الشعر والابداع . من خلال هذه المساحة نعيد لكم نجوم كل المواسم في باقة شعرية نقدمها لقراء ومتابعي الوكالة.
واحة اليوم كانت مع نجم شاعر المليون محمد بن ساقان الذي أهدى الوكالة ثلاث قصائد مميزة .
مجلس أهدابي
حبيبي الحزن لاقلطتك عيوني
رتب كنب ضحكتي في مجلس اهدابي
وتمرك عوج الحنايا وافرش شجوني
انت المعزب وضيفك باقي اعصابي
مابعدك الا التعب واقصاك من دوني
وماقبلك الا ضغون الصبر وركابي
وهذي فراغات عيني من ورى نوني
تغرف من الحزن دمع وتسقي كتابي
والصمت عشعش على شفاهي ومكنوني
قام يتعرّش من الحسره جذع نابي
وجريد وجهي عسيبه يبس ومزوني
جهّت قبل لاتلقّح بَكرة ترابي
والشمس ترقى السما وتهل بجفوني
قطره عرق من جبين الوقت يندابي
والمغرب اللي يصب من الغسق لوني
وشلون يمحي الضيا في لوحه غيابي
حبيبي الحزن بسولف على ظنوني
مليت اسولف على غيري وانا مابي
برد تنحنح وحيفه وارعب غصوني
واشعلت من منقد العشاق مشهابي
وآكن تبغ الوجع ويكح غليوني
من مابي اللي يضيق بكثر يامابي
والصبر مفتاح والضيقات صكوني
من وين بالقى الفرج لا سكروا بابي
مليت اجي لك من الضيقه على هوني
ومليت اروح وانا اتعابي هي اتعابي
قلت اتوكا على اصحابي وهدوني
على رفات الدروب وضيعة احبابي
عرفت بان الوجيه اشباه بعيوني
اصحاب حزني ولا لا أحزاني اصحابي
حبيبي الحزن تدري ويش بردوني
شئ سترته على ردونك وعرابي
ثيابي اول افصالها على متوني
ومتوني اليوم افصلهاعلى ثيابي
اربع وجيه
صديقي اللي بالمحبه تراني
محبوب كل الناس واللي حواليه
أنا لي اشكال وصفات واماني
ولكل شكل انسان في اربع وجيه
واحد كثر ماهو على الناس حاني
ضيّع نصف عمره من ايديه بـ ايديه
لا قادر يرجع ما فات بـ زماني
ولاعارف من العمر وش عاد باقيه
وبرغم هذي التضحيه والتفاني
ما احدً درى من ضيقة الصدر وش فيه
وواحد ذبحه الشعر لانه يعاني
من جرح فرقاً جاه من كف غاليه
اللي عطيته كثر ما هو عطاني
حزنً جرح القلب المحب ومحانيه
كله عشان ارضاه ما هو عشاني
ولاهو بـ مرضيني ولا هو بـ مرضيه
واحد محب لـ ذات نفسه واناني
ما يبغي العالم ولاهي بـ تبغيه
يكره من الفرحه ليالي التهاني
ويعشق من الضيقه مأتم لياليه
والضيق مثل العمر والعمر فاني
نفرح بـ ميلاده ونبكي بـ تاليه
وواحد ماهو مني ولا من كياني
وعلى كثر ما اجهله مدري شـ سميه
وانا مابين الاربعه ما خذاني
الا اللي ما اعرفه ولا لي دخل فيه
كرز شامي
رباه كيف …اكتبك …بالشعر والمّك
بـ اطراف الاحلام…لامن مرني طيفك
•
ووجهك قصيدة حسن والميم في سمّك
حبّة كرز شاميًّ … ضمّت سواليفك
•
فـ قم حطني من غلاتك في طرف كمّك
اوّ لّمني بين …ضلعيك …وسراجيفك
•
مبطي وانا ما شعرت من الغلا يمّك
انك المعزّب لا احاسيسي وانا ضيفك
•
انا احبك واغبط …من البشر امّك
عليك …لكنّي اكره بالحكي …زيفك
•
واليا استحو وجهك المملوح من دمّك
يصير اجمل بواجد من تـ تواصفيك
•
طالبك …لامن جلست من الوله يمّك
ياللي الغلا ما هو بـ كيفي ولا كيفك
•
سولف من عيونك وطالعني بـ فمّك
سوالف عيونك اصدق من سواليف
