الرئيسية / قسم الاخبار / الاخبار الرئيسية / واحة شاعر المليون: سلطان المريخي بين ياصاحبي و الغصن الرطيب

واحة شاعر المليون: سلطان المريخي بين ياصاحبي و الغصن الرطيب

(واحة شاعر المليون)، مساحه جديده في وكالة انباء الشعر العربي، نقدم من خلالها نجوم شاعر المليون في كل مواسمه عبر نصوص شعريه جديدة لنعود بذاكرتنا الى ثلاثة عشر عاما من الابداع والتميز والحضور المبهج في مواسم شاعر المليون في مواسمه التي حفلت بكل ماهو جميل تلك السنابل التي زرعها ثمانية واربعين شاعر قدمهم البرنامج لتزهو بهم ساحة الشعر والابداع . من خلال هذه المساحة نعيد لكم نجوم كل المواسم في باقة شعرية نقدمها لقراء ومتابعي الوكالة.

واحة اليوم كانت مع نجم شاعر المليون سلطان المريخي الذي أهدى الوكالة ثلاث قصائد مميزة .

 

ياصاحبي 

يا صاحبي لا تشكي الهم والعوق
طبع الزمن ما يصفى لو هو زمانك ..

عيش الحياة ونظرتك دايماً فوق
كبّر طموحاتك .. ويكبر مكانك ..

والنفس يم الطايله سوقها سوق
ولا تلتفت .. للي يدوّر طمانك ..

والدرب لا تمشيه لا صار مطروق
دوّر على المهيوب واسرج حصانك ..

ترا الرجل هيبه وهقوه ومنطوق
خلك جبل في صمتك وفي بيانك ..

ولا تحتقر في دنيتك اي مخلوق
تواضعك لـ الناس يرفع كيانك ..

ولا تعادي .. كل ساذج ومطفوق
خلك عزيز النفس .. يزداد شانك ..

وترا الحقوق احيان يبغالها حلوق
مرات تاخذ حاجتك في لسانك ..

ولا تطلب العالم لو الثوب مشقوق
بعض البشر لامنك احتجت هانك ..

وخل الكدر وألعب على كل طاروق
ولا يغرك .. صيتك وعنفوانك ..

فل الحجاج وكل مطرود ملحوق
وعيش الزمن لو كان ماهو زمانك ..

الغصن الرطيب 

الطيور اللي تغني على الغصن الرطيب
ما درت عن دمعةٍ فـ العيون الحايرة ..

ضايقٍ صدري واشوف البلد ماهو رحيب
ليت لي جنحان ، مثل الطيور الطايره ..

علتي فالصدر .. و علاجي ماهو بالطبيب
والله اللي .. عالم بـ عبده .. و سرايره ..

الظروف احياناً .. تخلي الهيّن صعيب
لا تلوم الضايق .. اليا ذرف عبايره ..

تلعب الدنيا مثل لعب ضافية السبيب
كل ما هب الهوى عرّضت امغايره ..

راح عمري .. روحة اللي يدور له ذهيب
والسنين تمر .. مثل القطاه الذايره ..

الحظوظ ان زانت .. تخلي الخايب يطيب
خل عنك اللي حسب ربحه وخسايره ..

كل ما هقيت لي هقوه بطيّب .. تخيب
يا حسافة صاحبٍ ما صفت ضمايره ..

والله اني يوم طوفت زلات القريب
خايفٍ ربي .. ما خفت السنين الجايرة ..

علّم اللي يحسب البندق العوجا تصيب
كان ما ثارت على علم .. ماهي ثايره ..

قالوا ان الذيب لامن عوا .. جاوبه ذيب
قلت يا قل الذيابه نهار .. الغايره ..

وقالوا ان الحر لا ضاق شمسه ما تغيب
قلت يا زين السفر فوق متن الطايره ..

من رقا للرجم ما يرضى في بطن الشعيب
يا علي .. لا بد يومٍ تدور الدايره ..

 التاريخ والشيخه

حفيدة التاريخ والشِيخه
بنت القصيد ومطمع الشعار ..

الشعر لا من احتمى صيخه
شاعرك شاعر ما عليه غبار ..

والحب في قلبي مناويخه
تقول من بيني وبينه ثار ..

وسوالف العشق ومطانيخه
مرت على قلبي وقلبي حار ..

ما بين تعذيبه وتوبيخه
ما عاد هو داري وش اللي صار ..

قلبي واعرفه صعب تنويخه
وشلون قدامك غدا محتار ..

وما بين تفريعه و تكفيخه
طرتي وعقلي مع وصوفك طار ..

وغرامك وساعٍ تخاتيخه
ما داجت ابه مهار والا بكار ..

ما اغار من مجدك وتاريخه
انا عليك من العباه اغار ..

والزين واجد وانتي يالشيخه
من رزتك كل الطوال قصار

ومن كوكب الزهره لمريخه
اخذتي امن الزين تسع اعشار ..

 

شاهد أيضاً

عبد العزيز المسلم يتناول تجربة الشاعر ماجد النعيمي في “شدو الحروف”

تناول سعادة الدكتور عبد العزيز المسلم، رئيس معهد الشارقة للتراث، الشاعر “ماجد بن علي النعيمي”، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *