وكالة أنباء الشعر
مقالات مشابهة
(واحة شاعر المليون)، مساحه جديده في وكالة انباء الشعر العربي، نقدم من خلالها نجوم شاعر المليون في كل مواسمه عبر نصوص شعريه جديدة لنعود بذاكرتنا الى ثلاثة عشر عاما من الابداع والتميز والحضور المبهج في مواسم شاعر المليون في مواسمه التي حفلت بكل ماهو جميل تلك السنابل التي زرعها ثمانية واربعين شاعر قدمهم البرنامج لتزهو بهم ساحة الشعر والابداع . من خلال هذه المساحة نعيد لكم نجوم كل المواسم في باقة شعرية نقدمها لقراء ومتابعي الوكالة.
واحة اليوم كانت مع نجم شاعر المليون خالد رافع العنزي الذي اهدى الوكالة ثلاث قصائد مميزة .
سرب الغرام
حبيبي كل تفاصيل المحبه من غلاتك غير
حنانك .. وصلك .. افراقك .. وحر الدمع احداقي
انا محتاج لفراقك مثل وصلك بلا تبرير
عساي ابدع قصايد حب تكشف خافي اعماقي
لو الفرقا تجرّحني بسيف ٍ مثل سيف الزير
جروحه في وسط صدري وْ بعضها داخل اوراقي
يزين العشق للعاشق و تبدا روعة التعبير قصايد عشق توصفني و تخطف ذوق عشّاقي
فراقك علّم الشاعر يسولف للزهر و الطير
وشعره علّم العالم طريقة عشقنا الراقي
يخبرونه جبل لكن رياح النحت و التغيير بدت تنحت مبادينا و تزعج طيبة أخلاقي
ترى ذاك الحياوي ما برا جرحه مع التخدير
عجز عنّه دوا الدكتور و العطار و الراقي
و بير ٍ يكتم احساسه فضح سرّه و فاض البير
ألا كيف الهوى يضمى و انا واقف على الساقي!
أرد الدمع لين افطن لجيش الشوق جاني امغير
و لا لي غير اسلّم له قفل دمعي و خفّاقي
اسير بْطوعه و ْ شوره ولا ادري وين دربي ايْسير
أنا متأكد لحبك دروب الشوق تنساقي
و أمر الصبح شباكك و انادي لك صباح الخير
و اطيّر لك غلا قلبي يسولف لك عن اشواقي
مهو سرب الحمام اللي تشوفه ياحبيبي يْطير
هذا سرب الغرام اللي كفخ من داخل اعماقي
ينادي لك : حبيبك ما قدر يصبر على التأخير
يغنّي مثل أبو نوره ( شبيه الريح وش باقي )
خيرك عتيق
لا تسولف لي ترى خبرك عتيق
زارعين الشوك للشوك احصدو
خابرين الذيب والضبع العويق
وخابرين اللي اهتدو واللي غدو
الحقايق من طرف عيني تويق
لكن اكتمها على سلم البدو
كم عدوٍ لابسٍ ثوب الصديق
وكم صديقٍ كنت احسْب انّه عدو
التجارب خلّت الغافي يفيق
واكشِفَتْ حسّادنا ليه احسدو
طوّر افكارك وخطّط لك طريق
النجاح اوفى جواب اليا انقدو
رتّب اصحابك على العلم الوثيق
واعرف الوافين غير اللي اجحدو
واعرف الالماس يبقى له بريق
والحصى ما ينبغى لو هو هدو
قرّب اللي يقترب كل ماتضيق
وابعد اللي ساعة الضيق ابعدو
كرامتك
كرامتك لعيال عمّك كرامه
وْكرامتك بالاجنبي للقبيله
احدٍ يجمل في فعوله عمامه
واحدٍ يجيب الناقصة والفشيله
كم واحدٍ يرفع مقامك مقامه
وكم واحدٍ ما ودك احدٍ دري له
ازبن على اللي فيه طيب وْشهامه
واحذر من المخيول لا تلتجي له
ياصاحبي ماهي بلحية وسامه
الطيّب اللي يكسبك في جميله
لا قلت تكفى ..جاك كل اهتمامه
(ومن وين ماهبّ الهوى يرتكي له)*
واللي يكسّر دون ربعه عظامه
ماهو مثل راعي الردى والرذيله
اللي نهار الضيق مثل النعامه
لحتاجوا الفزعات جاب الهزيله
لو هو جمل يمدي عرفنا سنامه
لا شال شيِّ مْن الحمول الثقيله
ان جيت له بالطيب جاتك سهامه
تطعن قفاك بْكل خبثٍ و حيله
طعْم البحر ما غيّرته الغمامه
لوّ امطرت فوقه سنينٍ طويله
و ارض الردى ما تنبت الا الندامه
لوّ ينزرع فيها الكرم و الفضيله
فاحذر تطيع الياس والا الملامه
واترك دروب اهل القلوب العليله
خلّك على طيبك ليوم القيامه
والله يجازي كل راعي جزيله
دام اصلك الطيّب عطاك الكرامه
طيب الرطب من طيب عالي نخيله
