وكالة أنباء الشعر
مقالات مشابهة
مساحه جديده في وكالة انباء الشعر العربي نقدم من خلالها نجوم شاعر المليون في كل مواسمه عبر نصوص شعريه جديدة لنعود بذاكرتنا الى ثلاثة عشر عاما من الابداع والتميز والحضور المبهج في مواسم شاعر المليون في مواسمه التي حفلت بكل ماهو جميل تلك السنابل التي زرعها ثمانية واربعين شاعر قدمهم البرنامج لتزهو بهم ساحة الشعر والابداع من خلال هذه المساحة نعيد لكم نجوم كل المواسم في باقة شعرية نقدمها لقراء ومتابعي الوكالة.
واحة اليوم كانت مع نجم شاعر المليون إبن الجوف متعب النصار الشراري الحاصل على المركز الثاني في الموسم الثامن من مسابقة شاعر المليون ، متعب النصار أهدى وكالة انباء الشعر العربي قصيدتين حملت عناوين (توكل على الله، تأخرتي).
(توكل على الله)
توقّع من اللي ماتوقّع ولا ينشاف
ترا القلب الأسود يخدعنك مغاتيره
تسوق النوايا البيض وتحقق الأهداف
ويجيك الردى ممّن تباعدت تقصيره
الأحرار تلقى عندهم مرجلة وإنصاف
والأنذال مامعهم سوى الحقد والغيرة
توكّل على الله وأسر يالبارق الهتّاف
تصبّح على ديرة وتمسي على ديرة
تدور الليالي وانت حملك على الأكتاف
جبل والجبل ماحركنّه معاصيره
تشيل الثقال ويحسبونك تشيل خفاف
يابعض الأوادم يا الله الصبر والخيرة
ترى الناس فيها أنفس عزيزة وفيها ضعاف
ومن ينكسر بالضعف ياصعب تجبيره
فلا تلتفت وإعرف ترى ماعليك خلاف
لو أهل الحسد كلاً يطبل على زيره
عط اللي يحبك عين فرشه وعين لحاف
الاحباب عملة والذهب ماتبي غيره
يزوم الرجل عن كلمةٍ تورد الميهاف
ولايرتمي مابين جرفٍ ودحديرة
إذا ماتمشلح وإعتلى عالي المشراف
فلا بارك الله في حياةٍ بلا سيرة
عطايا الله اللي من ذراعه يجن نظاف
ولا منّة اللي يسبق إيديه تصويره
ترى العمر يقضي والليالي تبي ميقاف
وترى الوقت مايرحم ولو طال تخديره
وترى الشعر مثل الطير متمرّد وعيّاف
ولا كل شاعر يقنص النادرة طيره
عزوم الرجل مركب وهقواته المجداف
يعبر البحور الهايجة ما أختلف سيره
واذا زانت أحواله وذعذع له النفناف
عسى الله يهني راعي الخير في خيره
(تأخرتي)
غريبة وينك الليلة تأخرتي ! وش اللي صار ؟
فقدتك ياعسى اللي أخّرك عنّي سبايب خير
ماهي عادة تغيبين المساء كلّه بدون أعذار
وغيباتك دقيقة عن عيوني تُعتبر تأخير
أنا بك شاعرٍ غنّى ونافس أكبر الشعّار
كثر مايعشقك يكتب ولا يحتاج للتبرير
لعينك يمتطي صهوة شعوره وإن تفرعن طار
مادامه ميّت بحبك وش اللي يمنعه لايطير ؟
أحاسيسي تجاهك كنها في حالة إستنفار
معك وجه الحياة المبتسم مايعرف التكشير
دفا وصلك نسيت ْبه الشتاء وإنكشفت الأسرار
ووجه العاشق مبيّن ماهو في حاجة لتفسير
تقول إني مسوي ذنب وتلاحقني الأنظار
وإذا زاد إشتياقي تقل ينفخ في حشاي الكير
أحبك كثر ماحرك شعوري عطرك الفوار
وأحبك كثر مالمعة عيونك تعشق التخدير
فداك العاذل اللي متعبٍ عمره ورا الأخبار
يهيجن كل مافرّق ويزعل يوم أشوفك مير
تعالي كل ما غط النهار وراحوا الزوار
محبتنا صريحة والغلا مايقبل التزوير
على درب الهوى ماهو ضروري تسقط الأمطار
يكفّي بس تمشينه وينبت فوقه النوّير
جنون العاشقين أجمل محطة ، وأطول الأعمار
عمار اللي يحبون بشرف مافكروا بالغير
