وكالة أنباء الشعر
مقالات مشابهة
مساحه جديده في وكالة انباء الشعر العربي نقدم من خلالها نجوم شاعر المليون في كل مواسمه عبر نصوص شعريه جديدة لنعود بذاكرتنا الى ثلاثة عشر عاما من الابداع والتميز والحضور المبهج في مواسم شاعر المليون التي حفلت بكل ماهو جميل. تلك السنابل التي زرعها ثمانية واربعين شاعر قدمهم البرنامج لتزهو بهم ساحة الشعر والابداع . من خلال هذه المساحة نعيد لكم نجوم كل المواسم في باقة شعرية نقدمها لقراء ومتابعي الوكالة.
واحة اليوم كانت مع نجم شاعر المليون الإعلامي والشاعر السعودي الكبير زايد الرويس، الذي أهدى وكالة أنباء الشعر العربي قصيدتين بعنوان (الليالي عقيمه، شعور المسافر).
الليالي عقيمه
العمر يركض والليالي عقيمة
من قحطها ما تنبت أيامها ريف
تدور دورات السنين الأليمة
والرجل يصبر لو على رقبته السيف
ألّا على الذلّة وقل الحشيمة
ماهيب للحر المسمّى تواصيف
ان كان ما خليت للنفس قيمة
تضيع ما بين الرجال العواريف
لا تحضر الّا كان جاتك عزيمة
لو المعزب عمك وخالك الضيف
درب الميانة له مكانه وتيمه
فاللازمة وألّا فـ قلّ التكاليف
مسبتك لـ عيال عمك جريمة
ما تكسب ألا ذم الأجناب والحيف
والطيّب اللي خطوته مستقيمة
ما يظلم مسالم ولا ياكل ضعيف
مع العرب يمشي بـ نيّة سليمة
ما دام أبو وجهين يمشي على الزيف
ما ضاعت سلوم الرجال العظيمة
دام اللحى مصبوغةٍ بالمعاريف
من طاب طب له .. والمناهج كريمة
وترى الرجال أفعالها : بنك تسليف
أحرص على عرف الحرار العديمة
وألا الردي ” لا عرف منهو ولا شيف “
شعور المسافر
سولف عن الغربة .. وأسولف لك أيام
وأنا مقيم .. وبي شعور المسافر
قصايدي ما عاد تاسع للأحلام
مع التعب .. والهم .. والفقر كافر
واللي هقيته بالأمل درع وحزام
أول من أنشب فالعروق الأظافر
يا تارك الضيقات في دربي حطام
وش فيك تاطى فرحتي وطي حافر
وانت الذي ما غيرك يقود الإلهام
ظلمك غدا واضح وبيّن وسافر
قلبي يتيم وخبري تحب الأيتام
شحيّت وانت اللي بك العطف وافر
ما كنت اسولف لك عن الغربة أيام
وش فيك مليت الحكي والمسافر
