وكالة أنباء الشعر
مقالات مشابهة
(واحة شاعر المليون)، مساحه جديده في وكالة انباء الشعر العربي، نقدم من خلالها نجوم شاعر المليون في كل مواسمه عبر نصوص شعريه جديدة لنعود بذاكرتنا الى ثلاثة عشر عاما من الابداع والتميز والحضور المبهج في مواسم شاعر المليون في مواسمه التي حفلت بكل ماهو جميل تلك السنابل التي زرعها ثمانية واربعين شاعر قدمهم البرنامج لتزهو بهم ساحة الشعر والابداع . من خلال هذه المساحة نعيد لكم نجوم كل المواسم في باقة شعرية نقدمها لقراء ومتابعي الوكالة.
واحة اليوم كانت مع نجم شاعر المليون الشاعر عبد الله مدعج الذي أهدى الوكالة ثلاث قصائد مميزة .
شباك بالي
على شباك بالي هبت الذكرى وانا اللي كل
مامالت للحنين أغصان طيفك طار نسياني
تذكرتك وانا اغني “ابا اركض فالمطر وابتل”
ياليته لاغسل وجه الشوارع يغسل احزاني
وناديتك وانا عيني تغورق والكلام يهل
وكلام عيوني اللي فالغياب اصدق من لساني
ياكثرك داخلي وآخاف لو طال الغياب تقل
وأخاف القى بعدك اللي يبيني ويتمناني
ياليتك جيتني قبل الشعور من الشعور يمل
ومعك باقي العمر كل العمر يمديك تنساني
تعبت اهرب من الذكرى ومثلك ذكرياته ظل
لو أن الارض تركض تحت رجلي ما تعداني
غريب اكثر من اني عايش بغربة وفاقد خل
وحيد أكثر من اني في زحام الناس وحداني
اشوف ان المفارق مشكلة وانته تشوفه حل
مثل ما الحب اشوف انه غنى و تشوفه اغاني
تمر احلى مواعيدك معي مثل العمر و تزل
واخاف انك تجي في موعد وماعاد تلقاني
بكيت بيوم توديعك ما زاد من الدموع و دل
ياليته مايجيك اللي بيوم فراقنا جاني
و بابكي لو يقولون أن دمع الرجل عيب وذل
انا احس اني ليا من بكيتك يرتفع شاني
هدايه للظلال
حسبت من عمري الماضي وش اللي جنيت
اسهل عليه من حسابي وش اللي خسرت
دورت لي شي اعده مكسب ومالقيت
شف مر عمري بليا مكسب وما شعرت
تعبت ادور هدايه للظلال اهتديت
الناس كبرت حواليني وانا ما كبرت
كنت اقدر اكبر واطول الحلم ولا بغيت
كنت اقدر اوصل بغنضة عين بس انتظرت
ما ابي طريق يوديني وانا مامشيت
ولا ابي انتصارً يخلدني وانا ما انكسرت
صحيح ماجتني الدنيا على ما اشتهيت
ولو جت مثل ما اشتهي ماكان يوم اعتبرت
يكفيني اني تجاوزت الجروح و وفقيت
على كثر مانسوني واجرحوني شكرت
كنت اقدر انسى واقول لقلبي اني نسيت
واليوم ميت على النسيان ولا قدرت
حزن مرمي
يصعب الدرب و تطول المشاوير
و اقطع البيد ولا اقطع مسافة
كل ما قلت بكرة ينكتب خير :
قمت بكره على حزن وسخافة
صار قلبي يعرف اللي يبي يصير
كنه ابغفله من الوقت شافه
غن ياقلب لاحزانك مقادير
غن للعمر لو هو عمر تافه
قل له أسرع واذا انك تقدر تطير
طييير.. حتى النسم صاحبك عافه
صاحبي وش بقى لك كم معاذير
خنتني كثر ما اوفي، يا حسافه
قل للايام ماباقي مخاسير
وش بقى ماخسرته لاجل اخافه
صاحبك ماكسب من هالعمر غير
حزن مْرمي على رفين قافه !
