وكالة أنباء الشعر
مقالات مشابهة
(واحة شاعر المليون)، مساحه جديده في وكالة انباء الشعر العربي، نقدم من خلالها نجوم شاعر المليون في كل مواسمه عبر نصوص شعريه جديدة لنعود بذاكرتنا الى ثلاثة عشر عاما من الابداع والتميز والحضور المبهج في مواسم شاعر المليون في مواسمه التي حفلت بكل ماهو جميل تلك السنابل التي زرعها ثمانية واربعين شاعر قدمهم البرنامج لتزهو بهم ساحة الشعر والابداع . من خلال هذه المساحة نعيد لكم نجوم كل المواسم في باقة شعرية نقدمها لقراء ومتابعي الوكالة.
واحة اليوم كانت مع نجم شاعر المليون بدر الكبيح، الذي أهدى الوكالة ثلاث قصائد مميزة .
أحلام سعيدة
شقولك و الليالي .. ما عطتني خبر !!
لا دارت .. تدور لين تعيّشك بالافا !
ادري انا اللي تركتك .. بس مالك عذر ،
كنت اتحايل لوصلك .. و انت كلك جفا ،
الحب مثل الورود تموت دون المطر ،
كنت اتمناك ملقى .. لو مابه حفا !
وصلتني لمرحلةْ (لمحه و اقطع شهر ) ،
ما كنت ابي منك احضان و حنان و دفا !
سبلتني للغياب المر .. و اللي امر !
قلبي كثر ما يشع النور .. نوره طفا !
في كل مره عليه اقسي عليك يغفر ،
كأن مخلوق من طيب و حنين و وفا !
لا زال بأوراقه البيضا حياه و عطر !
ولا زال وافي بدونك .. دام لجلك صفا !
لا تحسبه يدله و سالي و حاله يسر ،
يدور اي شي يكفي عنك .. ما شي كفى !
ولاتحسب الفقد يبحر به لشاطى السهر ،
علق على جال صدره دمعتين وغفى !
مالك عذر
ليه لَـ احتجت السعاده .. ما تبيّن ؟!
حتى لو ظروفي ظروفن عنيده !!
ㅤ
كم ضحكه للفرح كنت متديّن ؟
بس ابي اكسب لي اي شغله جديده !
ㅤ
و ليه يقسى في دروبي كل ليّن ؟
لي ذنوب صغار .. بس انسان سيده !
ㅤ
و ليه احلامي عشانك ما تَهيّن ؟
والله ان أحلامي احلامن سعيده !!
ㅤ
كنت احط .. و كنت اشيل .. و كنت أزيّن !!
و لا تزيّن شي يا ( أقرب بعيده ) !!
ㅤ
كل طاقاتي عن المجهود عيّن ،
ما بقى في غيبتك حاجه مفيده !
ㅤ
من يفتش هالحنايا .. ما يعيّن :
غير جرح و قلب مهجور و قصيده !
ㅤ
كل ضيق يهون لو ماهو بهيّن ،
ليه اضيق … و ربي ما ينسى عبيده ؟!
شوي شوي
يكفّي عناد … لجل العشره اللي بيني وبينك ،
تعال و شوف .. كيف تطيح اوراقي شوي شوي !
دخيلك كثر مَـ احتجت لدفاك و قلت لك وينك ؟
كثر مَـ احتاج لك هذا الكيان و لا بيديني شي !
انا شذنبي مدام اللي حصل كله من ايدينك ؟
تعاندني و انا اللي كنت لك شمسك و كنت الفي ؟
عشانك كنت اطوّف كل زله … وانت للحينك :
تخليني بروحي و الليالي .. لا قمر .. لا ضي !
انا حتى سنيني ما تمر الا مع سنينك ،
دخيلك لا تموّتني بدونك دام قلبي حي !
اذا هانت بعينك كل دمعه … طاحت لعينك ،
انا ماهان بعيوني دموعك .. يوم طاحت لي !
