الرئيسية / قسم الاخبار / الاخبار الرئيسية / واحة شاعر المليون: سلطان المسما في الشجاع الجسور ومرت الذكرى

واحة شاعر المليون: سلطان المسما في الشجاع الجسور ومرت الذكرى

مساحه جديده في وكالة انباء الشعر نقدم من خلالها نجوم شاعر المليون في كل مواسمه عبر نصوص شعريه جديدة لنعود بذاكرتنا الى ثلاثة عشر عاما من الابداع والتميز والحضور المبهج في مواسم شاعر المليون في مواسمه التي حفلت بكل ماهو جميل تلك السنابل التي زرعها ثمانية واربعين شاعر قدمهم البرنامج لتزهو بهم ساحة الشعر والابداع من خلال هذه المساحة نعيد لكم نجوم كل المواسم في باقة شعرية نقدمها لقراء ومتابعي الوكالة.

واحة اليوم كانت مع نجم شاعر المليون  سلطان المسما الذي أهدى الوكالة ثلاث قصائد مميزة .

 

افهق الليل

قم وافهق الليل عن وجهك .. بصبّح عليك
سمارك ( الصبح ) وخيوط الظلام : شعرك

اي والله انّي من البارح وانا محتريك
الليل يسأل عليك وقلبي يدوّرك !

من حقي اعاتبك لاني احبّك وابيك
واغار من هالنعاس اللي سكن محجرك !

الحب يكبر معاك وعاش منّك وفيك
حتى انا ما وعيت الا وانا شاعرك

مدري منين اوصفك ولا منين ابتديك
الشعر مايحصرك والزين مايحصرك

كل الوصوف الجميله بعض مما لديك
من رزّة وقوفك ليا ملحك وسكرّك

ياكثر ما اضيّع اليا شفت ( نظرتك ذيك )
عاد انت ( نظرتك ذيك ) تجيبني واسهرك

ابي كلمات غير ( احبّك .. اموت فيك )
عشان احس انّي امّيّزك ومقدّرك !

جيتك وانا كلي احساس و وعي يوم اجيك
ماجيت اسهّر عيونك وازعلك واهجرك

جيت آخذك لـ الليال المقبله من ايديك
ابي اعيشك عمر من اولك لـ آخرك 

مرت الذكري

مرّت الذكرى على بالي وانا بالي معاك
وياكثر مامرّت الذكرى على البال وسريت

افهق عقالي واشغل موتري و ارقب سماك
والله ان شارعكْ يعرفني واعرفه بيت بيت

قول مافي خاطرك لا يشغلك عني حياك
دامني في وجهك الخمري سرحت وماضويت

والله ان اعذب شعور يمرني .. ضحكة شفاك
والله ان اجمل كلام يمرني .. لا من حكيت

يافديت عتابك اللي بين غيره وارتباك
ويافديت البحّه اللي في محاتاك وفديت

نظرة الزعلان لا من جيتك ادوٌر رضاك
وبسمة المتغلّي اللي بسمته يعني : رضيت 🙂

قال : شِعرك ؟ قلت : فيك ، و قال : قلبك ؟ قلت جاك
و قال بالك ؟ قلت بالي اشـ قيمته لو ماطريت !

انت تعرفني ما اعرف افضفض ل شخصٍ سواك
وين اودي دمع عيني لاتضايقت وبكيت !

لا تخليني انا ما اعرف اعيش الا معاك
وانت ماتقدر تكون لـ شخص غيري ماحييت

الشجاع الجسور 

تعيش الاحلام في قلب الشجاع الجسور
ما تكسر عزومة الدنيا و دوراتها !

لو تجعل الحظ شمّاعه .. يصيبك فتور
وتسلّم رقبتك لـ بقعا وصكاتها !

النفس مثل الفرس تبي ذهين وصبور
بس انتبه لاتكسّر : معنوياتها !

اصنع لها في دروب الليل نفحات نور
وحاول تعزز ثقتها فـ اختياراتها !

صديقي الصدق لان الصدق سكه ( شعور )
بين القلوب الحقيقيه ونبضاتها !

وضعاف الانفس ليا قامت تلف وتدور
تكبّر اللا حقيقي من تفاهاتها !

حتى ايش لو قالوا ان سلطان صابه غرور
اهل الحركات ماتخلي حركاتها !

انا مع الطيبين النادرين مخبور
اللي لا جاك الصحيح تبين وقفاتها !

ودك يكون الرجل واعي في بعض الامور
ماينحدع فالوجيه وفـ ابتساماتها !

 

شاهد أيضاً

عبد العزيز المسلم يتناول تجربة الشاعر ماجد النعيمي في “شدو الحروف”

تناول سعادة الدكتور عبد العزيز المسلم، رئيس معهد الشارقة للتراث، الشاعر “ماجد بن علي النعيمي”، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *